By November 6, 20180 CommentsReport

அடுத்து அவருடன் தான் நடிக்க ஆசை – கீர்த்தி சுரேஷ்..!!

விஜய்யுடன் 2வது முறையாக ஜோடி சேர்ந்ததில் உற்சாகமாக இருக்கிறார் கீர்த்தி சுரேஷ். அவர் அளித்த பேட்டியில் இருந்து…

சண்டக்கோழி 2, சர்கார் என 2 படங்களிலுமே வரலட்சுமியுடன் நடித்துள்ளீர்களே?

ஆமாம். ஆனால் 2 படங்களிலுமே அவருடன் இணைந்து நடிக்கும் வாய்ப்பு இல்லாமல் போய்விட்டது. அவர் வரும் காட்சிகளில் நான் வரமாட்டேன். எங்கள் இருவருக்கும் எந்த பிரச்சினையும் இல்லை. இருவருமே ஈகோ இல்லாதவர்கள். எனவே நல்ல தோழிகளாக இருக்கிறோம்.

சாவித்திரி போல மீண்டும் வாழ்க்கை வரலாற்று படத்தில் நடிப்பீர்களா?

இல்லை. அந்த படம் அனுபவத்தையும் பக்குவத்தையும் மகிழ்ச்சியையும் கொடுத்தது. இன்னொருமுறை அப்படி என்னால் நடிக்க முடியுமா என்ற சந்தேகம் வருகிறது. அந்த அளவுக்கு சிறப்பாக வந்தது. அது ஒரு மேஜிக். முழுக்க முழுக்க கதாநாயகிக்கான படங்களில் மட்டுமே நடிக்க முடியாது. சண்டக்கோழி, சர்கார் போன்ற கமர்ஷியல் படங்களிலும் நடிக்க விரும்புகிறேன். அதுதான் ஒரு கதாநாயகிக்கு நல்லது. பெரிய படங்களில் ஒரு நல்ல வேடத்தில் இருப்பது என்பது நடிகைக்கு அவசியம்.

ஜெயலலிதா வாழ்க்கை வரலாற்று படத்தில் நடிக்க வாய்ப்பு வந்தால் நடிப்பீர்களா?

இப்போதைக்கு யாருடைய வாழ்க்கை வரலாற்று படத்திலும் நடிக்க விரும்பவில்லை. சாவித்திரியாக நடித்ததிலே நிறைவு அடைந்துவிட்டேன். போதும்.

ஓய்வில் இருக்கிறீர்களாமே?

ஆமாம். நடிக்க வந்ததில் இருந்து வேகமாக தொடர்ந்து நடித்துள்ளேன். எனவே சில மாதங்கள் ஓய்வில் இருக்கிறேன். வயலின் கற்றுக்கொள்கிறேன். சமைப்பேன். உடற்பயிற்சி செய்கிறேன். 20க்கு மேற்பட்ட கதைகள் கேட்டுள்ளேன். விரைவில் புத்துணர்வோடு மீண்டும் வேகம் எடுப்பேன்.

சாவித்திரி படத்துக்கு பிறகு சம்பளத்தை அதிகரித்து விட்டதாக செய்தி வந்ததே?

இன்னும் எந்த படத்திலுமே கமிட் ஆகவில்லை. அப்புறம் எப்படி சம்பளத்தை ஏற்ற முடியும்?

உங்கள் குடும்பத்தின் ஆதரவு பற்றி?

அப்பா சுரேஷ் ஒரு தயாரிப்பாளர். அம்மா ரஜினியுடன் நெற்றிக்கண் உள்ளிட்ட சில படங்களில் நடித்துள்ளார். இப்போது எனது பாட்டியும் ரெமோ, தாதா 87 என்று நடிகையாகி விட்டார். ஆக, எங்கள் குடும்பமே சினிமா குடும்பம் தான். அப்பா தயாரிப்பில் அக்கா இயக்கத்தில் பாட்டி, அம்மா இருவரும் நடிக்க திட்டமிட்டுள்ளோம்.

யாருடன் நடிக்க ஆசை?

தமிழில் விஜய், சூர்யா, சிவகார்த்திகேயன் ஆகியோருடன் நடித்துவிட்டேன். அஜித்துடன் நடிக்க ஆசைப்படுகிறேன்.

தொடரி போன்ற படங்கள் தோல்வி அடையும்போது உங்களை பாதிக்குமா?

இல்லை. வெற்றி, தோல்வி இரண்டையுமே ஒரே மாதிரியாக தான் எடுத்துக்கொள்கிறேன். எல்லாமே பாடங்கள் தான். அவற்றில் இருந்து கற்றுக்கொள்கிறேன்.


Post a Comment

CAPTCHA
Refresh

*